有冇睇過《慳錢家族》？鄭裕玲DoDo姐喺戲入面為咗慳錢，去酒店廁所洗臉，再去百貨公司化妝品櫃枱免費化妝、噴香水，但今時今日，大家慳錢或者可以去商場，皆因10月開幕嘅商場Elements，整咗一個號稱「全城最豪」嘅洗手間，而且呢個唔同某某嘅金廁所咁只可遠觀，大家仲可以「泄」玩。（排泄個泄，sorry，淑女點可以講啲咁嘢！）
喺九龍站上蓋嘅地鐵旗艦商場Elements走高檔路線，頭炮竟大晒廁所，喺商場最當眼位置整咗個洗手間，用高級酒店設施，仲放埋名牌香水、個人護理產品任人免費用；仲喺門口特設豪華等候區，畀男友、老公等伴侶去廁所時，坐喺真皮梳化睇雜誌。有一樣設施不得不提，就係設有機香薰油淨化空氣，呢樣嘢好重要，皆因唔知點解，商場女廁總係特別臭，有時要一邊閉氣，一邊XX，真係唔容易㗎。
逢周一至周四刊出