上個月諗住配股「骨」番2900萬但最後「喎」咗嘅中遠威生物製藥（8019），騎呢嘢陸續有嚟。噚日公司出咗個澄清通告話今日復牌，又澄清主席鍾志孟同執行董事穆勇之間因為一批股份嘅爭拗。
通告大致係咁講，穆生嘅一名關連人士上個月向港交所（388）同證監投訴，話鍾生曾經應承賣一批股份（約莫1.89億股）畀佢，但最後無咗件事。鍾生除咗否認賣股一事之外，仲搵埋港交所主席夏佳理間律師行，力證穆生呢個指控毫無根據。不過，穆生亦搵律師代表佢，出示證據反駁係鍾生唔認數。
故事喺03年10月發生，鍾主席同穆執董簽訂賣股協議，鍾主席分三次將3.63億股中遠威賣畀穆執董，第一次03年底至04年初，大約1.29億股股份成功轉讓；但到咗04年10月雙方同意取消交易，鍾主席話佢已經退番錢畀穆執董，但穆執董無畀番啲股票佢。不過，穆執董嗰一邊話，雙方簽嘅備忘錄，鍾主席會將所持全部中遠威嘅股份賣晒畀佢。
結果點？
鍾主席咪搵咗夏佳理嘅律師樓代表佢，同穆執董嘅律師信來信往。