家陣經濟好咗、失業率低咗，大企業頭痕係點樣留住人才。港交所（388）行政總裁周文耀收options賺到笑，一眾打工仔唔恨得咁多；不如叠埋心水諗吓趁好景，換咗個老闆好過。嗱，如果你真係咁諗，有個老闆可以考慮吓，之唔係周生生集團（116）主席周君廉囉！
跟供股票一手賺萬銀
噚日華華睇周生生嘅澄清公告，裏面講到集團底下嘅周生生證券，喺今年5月搞咗個月供股票計劃畀集團員工，每月最少供五嚿水，供番周生生股票可以免手續費同經紀佣金。唔好睇少呢啲手續費同經紀佣金呀，家吓去銀行月供股票，最少收50蚊㗎，小數怕長計嘛。
不過，唔收手續費事小，最緊要供嗰隻股越買越升。周生生股價就同港股一樣，越升越有，用5月2號周生生個收市價5.71蚊，計到噚日收市10.78蚊，足足升咗近九成，一手賺成皮嘢。
長遠仲有冇咁勁，華華冇水晶球，但單睇家吓嘅成績，你話呢個老闆，係咪冇介紹錯吖！