港股在高位繼續大幅波動，早段曾上升逾150點，但內地通脹高到得人驚，深滬A股大散拖累港股亦散埋，恒指最低跌近250點，收市23952，跌47點，H指則下跌77點。
大市在24000點水平橫行已有多日，個別發展越來越明顯，日日升同跌都有幾百隻，噚日上升正股同下跌正股就分別有近400隻同600隻，由於大市大幅波動，好多股票亦係大上大落，升得多嘅回得較急，跌得多嘅彈得亦速。
噚日推介嘅海油服務（2883）近期升幅較大，所以插起上嚟個勢亦好得人驚。海油服務噚日早段最高搶上15.30元，升0.80元，大行掃到停唔到手，但由高位倒插落去，又見幾間大行好似夾埋咁，唔計價，係咁掟，最低跌到13.22元，大跌1.28元，尾段反彈，又掃番上去14.16元收市，升番成銀。呢類基金股，大行對撼，撼到天昏地暗，散戶睇準個勢，高沽低入，搵到餐食。
好淡大戶大鬥法
另一隻呢輪大升嘅上海電氣（2727），噚日搶上新高後，插落嚟個勢又係好急，大行出出入入，喺度大鬥法。上電最高見5.61元，升0.28元，午後插到5.16元，收市5.22元，跌0.11元，有1.58億股轉咗手，戰況真係好激烈。
上電股價上月底復牌後急升近6成，由3.50元上到5.50元水平，全係一個「借殼A股」上市概念所帶動，上電的目標A股係持有83.75%權益的上海輸配電股份，噚日已係連續第8日漲停板，收60.16元，以此價計，上電現時股價仲有好大上升空間。
根據換股合併方案，1股上海輸配電可兌換7.32股上電A股，以噚日上海輸配電股價計，上電A股已值8.22元。上電往績PE29.3倍，預測PE20.7倍，以上電A股8.22元計，預測PE32.5倍，以內地A股平均的35至40倍PE計，亦即上電A股仍有上升空間。
仲有，上電正同上汽集團磋商，出售持有5成權益的上海柴油機股份公司，集中發展較具盈利的業務，以及提升整體經營利潤率及回報率，對公司長遠發展係「非常正面」。