馬力遺下嘅立法會議席需要補選，大家早知道一定係民建聯對泛民主派，問題係有幾多位候選人上陣競選啫。民建聯嗰邊係鐵板一塊，紀律好，服從性強，冇人哼過一聲話要出選，總之一切服從政治需要，聽取指示，團結一致。民主派呢，顧名思義，民主就係一人一把聲音，人人有意見、有嘢講，紀律第尾，自我第一，冇咁嘅性格嘅人，點會做民主派吖，老早加入民建聯，聽聽話話啦。
果然，民建聯方面一早傳出消息，不會貿然派人搶番民建聯主席遺下嘅議席，而係聽從指示，支持葉劉淑儀。民主派呢？熱鬧過元宵節睇花燈，甘乃威、何秀蘭、黃毓民、勞永樂、陳淑莊，甚至毛孟靜都先後傳出消息話要出馬，搞到要訂立「協調機制」咁緊要，其實呢幾位仁兄仁姐，無論邊位上台，都唔會係民建聯、自由黨、商界、工聯會一致支持嘅葉太對手，幾乎輸梗，只有一位黃毓民可以在選舉過程中迫到葉劉手忙腳亂，有番啲睇頭。
參加政治選舉嘅第一個目的係想贏，第二個目的係爭取選戰經驗，如果以前屢選屢敗嘅話，唔該唔好再參選嘞。如果想搞局博表現或知名度嘅話，當然亦可以參選，冇人阻止得佢。左丁山知道商界有唔少朋友支持葉劉，亦識得唔少中產對民主派好失望，認為佢哋得個吵鬧，互相爭鋒，預備唔投票。
好嘞，泛民主派卒之有人夠醒目，勸服陳方安生接受選舉洗禮，下海迎戰葉劉（現在反而想知道葉太會唔會退出，由民建聯搵人頂上），咁就勝算大增，起碼有五至六成機會贏。無論邊個贏，呢場補選如果真係陳方對葉劉嘅話，係一場重量級女士大戰，必然吸引國際傳媒來港採訪，成為國際新聞。用比例代表制選舉，陳方冇把握贏，今次變成係單議席之爭，邊個有50.1%嘅選票就係贏，而競選亦變為「普選vs非普選」，可以視之為政制改革爭論嘅一場大型民意（港島區民意）調查，曾特首不能視而不見（假如陳太贏嘅話），港島區選民千萬記得去投票呀！