前日，《蘋果批》高明輝、《利字當頭》利世民同我一齊放工。就喺大家執嘢之際，高明輝問利世民有冇好書推介，世民兄就話應該睇《萬曆十五年》。高明輝點點頭，繼續問：「仲有冇其他？」世民兄諗一諗，跟住就喺枱頭攞起一本書話：「呢本都OK。」
安倍落台 建制派做嘢
孫柏文望一望本書，跟住就向高明輝話：「呢本睇唔睇都罷，佢咁弱勢，遲早落台。」世民兄推介嘅書，就係安倍晉三嘅《邁向美麗之國》。點知噚日起身，睇電視新聞報道，日本首相安倍晉三真係辭職落台。Dammit，真係貼股票又唔見我咁準。
不過，前日我講完之後，世民兄就話：「如果真係落台，一定又係建制派做嘢。因為如果睇佢本書，你就知佢比小泉純一郎，仲想改革經濟。」聽完世民兄番話，我就諗起舊年5、6月，如果大家仲記得，當時全球所有資產價格一齊下跌。不論黃金、白銀、海外和本地股票都跌，直至到6月13日，全球所有資產價格都見底，之後反彈。
正當完全冇關係嘅資產，價格走勢一樣嘅時候，一定係貨幣本身作怪。其實，如果大家睇吓當日嘅《讀賣新聞》，就會知道點解。原來，有「內幕人士」放風，踢爆日本中央銀行行長福井俊彥涉嫌有醜聞，不過之後呢單新聞就銷聲匿迹。如果由陰謀論角度出發，「內幕人士」爆料，就係想警告福井俊彥，唔好搞搞震，要佢繼續印銀紙。「內幕人士」就係建制派，就係白銀戰隊要對付嘅紙幣狂魔。
今次，安倍晉三因內閣成員常常爆醜聞落台，改革步伐又停止。孫柏文當然擔心日本平民百姓繼續被欺凌，佢哋手上貨幣嘅購買力慢慢削減。最終去到極點時，令更激進、更民族主義嘅政客上台，20世紀20、30年代德國翻版。
炒「後悔私有化」概念
最後，噚日見到領匯（823）、地鐵（066）等股票上揚，孫柏文就要提供個新嘅投資概念。呢個，就係叫做「後悔私有化」概念。政府越後悔私有化一間企業，佢今日股價就越升。炒股票做功課、做分析、做fundamentalanalysis？呢啲資金投資方法，一定會被曾俊華司長「懲罰」，令自己輸錢。所以今日，要贏錢，唔需要睇盈利、賬面值、公司未來，只要「信曾得救」！
金手指網誌： http://phatdat.blogspot.com