前排，花旗做咗個中產調查，結論，係月入平均兩萬五嘅中產，每月應付完必要開支後，剩番得兩千三蚊使。華華睇完呢個調查都覺得好灰，不過，正所謂「人生滿希望，『錢』途由我創」，花旗為咗幫吓中產，搞咗個「尋找四萬七」嘅遊戲，邊個諗到用最有創意嘅方法搵四萬七銀返嚟，就有機會贏到四萬七銀！
進取投資買吓馬
想玩？你可以用中文或者英文，甚至圖片參賽，截止日期10月7號，詳情可以去www.findmy47000.com睇睇！華華上過個網站，發覺啲計仔幾有創意，好似叫大家每個月用1000蚊作進取性嘅投資，好似賭吓波、買吓馬咁，回報有五六成喎；或者上電視玩遊戲贏獎金；仲有人作埋打油詩㖭！冇計？唔緊要，獻計或者齋投票都有機會得獎。
啲創意計仔幫唔幫到大家就唔知，但個game就肯定幫到花旗。事關得獎者贏到嘅獎金，全部要入落去花旗個理財戶口，咁想攞到筆錢，就要成功開個理財戶口先，唔怪之得個game只限18歲以上人士參加，唔受小朋友玩喇！