噚日睇大陸網，呢頭見到國家統計局公佈8月份消費物價指數，肉禽價格升咗49%，嗰頭就見到個有關劉永好嘅訪問。
登上美國《福布斯》富豪榜嘅新希望集團董事長劉永好，一向有「中國飼料大王」稱號，近排就多咗個朵──中國頭號「豬倌」。乜嘢叫豬倌？華華查過，即係舊時農村裏面飼養牲畜嘅人，好似「羊倌」、「牛倌」咁。
堂堂富豪雖然靠畜牧業起家，但點都係坐喺冷氣辦公室運籌帷幄，點會落手落腳自己養啫？喺《華西都市報》嘅報道裏面，呢位養過鵪鶉、養過豬，話自己有「養豬情結」嘅內地富豪，準備豪掟50億人仔，建立現代化養豬生產鏈，甚至請學畜牧嘅大學生教農民科學化養豬。
今次到養豬發財
養豬有冇情意結，華華唔知，但劉永好肯做咁大投資，都係因為有錢賺，佢話：「風水輪流轉，呢次輪到畜牧業，輪到養豬嘅發財啦！」內地豬肉價格騰飛，佢認為係因為好多豬農走去城市打工𢱑銀，內地又未有規模化嘅養殖，搞到供求失衡，豬肉咪貴囉，但呢個就係商機。
劉永好82年已經搞養殖同飼料研究，既然家吓咁有商機，佢諗住建立一個現代化養豬供應鏈，仲話會培育榮昌豬同引入加拿大海波爾豬；不過上半年引入首批約400頭嘅海波爾豬，就喺留監等檢查嘅三個月，染病死咗唔少。
其實，對於劉永好嚟講呢啲好濕碎，早喺2000年，佢同兄弟四個人夾埋嘅身家，就俾美國《福布斯》列為中國第二大富豪；最近幾年分咗家，今年喺《福布斯》中國富豪榜佢都仲排16位。加上係民生銀行主要股東，由6.75元揸到𠵱家16.75元，錢？唔係問題，何況養豬先係佢杯茶。