最憎公司啲男同事，成日口花花撩女仔，阿貴特別口臭，話我哋一味節食減肥，唔肯做運動，係懶豬。你哋唔好睇小我哋肥肥哋，做起運動都去到好盡。好似噚日MegaBox嘅靚女公關Carol約咗我去佢商場玩「電子遊戲打機大挑戰」，喺全港最大、直徑達10米嘅商場螢幕VideoEye，試玩體感運動遊戲XaviX，我都打得好勁。
好似拳擊遊戲咁，玩家戴住嘅拳套裝有感應器，會感應到你出拳嘅情況，仲會自動記錄玩家消耗咗幾多卡路里、拳擊次數、持久力、速度等數據，可以寓打機於運動。加埋今次喺10米乘12米嘅橢圓形螢幕打機，咁鬼震撼，玩得更加投入啦。唔怪得兩個性感模特兒，打得咁兇狠啦（圖）。
Carol話即日起至下月7日逢周六周日同公眾假期，顧客喺商場內消費滿200蚊，就可玩一次，每日龍虎榜頭三名挑戰者，仲可以有MosBurger套餐食㖭。吓，打完機又食包，咪減唔到肥！
逢周一至周四刊出