𠵱家啲細路越嚟越矜貴，可以話，集萬千寵愛於一身，為咗令佢哋開開心心，父母都會盡量滿足仔女願望。問題係，唔係個個爹哋媽咪都咁多錢，每年皇帝仔、皇帝女生日，更加令唔少爹哋媽咪，頭都大埋，點可以𠱁到自己個心肝寶貝開心，又唔使使咁多錢呢？
MarketingMom喺《MSNBC》美國討論區話：「試過喺屋企，幫個女搞電影生日派對，利用屋企部投影機，將DVD投射去牆上面，再放晒啲枕頭被鋪落地，成間屋即時變咗個迷你影院。」佢仲親手整咗個iPod形嘅蛋糕畀個女㖭！
SactoSooz都覺得，簡單嘅生日會，已經可以𠱁到仔仔囡囡，「個仔7歲生日，我幫佢搞咗個好傳統嘅生日會，冇魔術師、冇彈床，成班小朋友，只係喺後院度玩集體遊戲，我仲整咗個大蛋糕送畀佢，雖然感覺有啲奇怪，但佢好滿意。」JerryAK更加認為，父母可以趁同仔女搞生日會嗰陣以身作則，灌輸正確嘅理財觀念。
其實，搞生日會之前，問吓仔仔囡囡想點，既可增進親子感情，仲可以知道佢哋究竟想要啲乜，話唔定可以慳番好多！