94年港姐冠軍譚小環，昨日與保險界才俊蔡強榮（Eric）共諧連理，姊妹團以核突的食物玩謝新郎，Eric除了要舔尿片，又要掛上尿袋，當他吃下臭豆混糯米後，更忍不住衝入洗手間嘔吐。其後一對新人在律師和至親見證下註冊結婚，Eric及小環同樣感動得眼濕濕，而婚宴場地也放置模仿港姐選舉的寶座，新郎認真細心。
現年35歲的譚小環昨日與年長7載的保險才俊蔡強榮（Eric）小登科，並邀請律師親臨尖沙嘴洲際酒店證婚，Eric原本安排了十位兄弟接新娘，可惜林國斌及李家聲因事缺席，由餘下八兄弟迎戰康華和姚瑩瑩等的四朵金花姊妹團。
新娘想玩埋一份
Eric率領的戥穿石昨早10時前已抵達酒店，他們浩浩蕩蕩上房接新娘，姊妹團預備了核突食物遊戲大玩一眾兄弟，看到尿片包着朱古力醬混榴槤，新郎Eric無可奈何下還是要大啖吞下，其後他又要穿上紅色性感底褲及掛上尿袋，由其他兄弟啜飲尿袋內的飲料，不過最惡頂是Eric要吃下臭豆混糯米，弄得他要衝入洗手間嘔吐。笑破肚皮的康華說：「啲遊戲真係幾毒辣，我估唔到新郎咁玩得。」
成功接新娘後，Eric便與小環返回薄扶林道豪峰花園男家斟茶，然後再折返洲際註冊。小環接受記者電話訪問時說：「今日好開心，接新娘時，我見到玩新郎嘅『架生』好搞笑，好想可以玩埋一份，因為Eric平時好有尊嚴，唔係要接新娘，佢一定唔肯咁玩。」身為譚家孻女的小環，嫁妝及行頭自然特別豐厚，她說：「我覺得自己嘅行頭勁過出席台慶。」一對新人婚後先到泰國小休，然後下月底才赴日本度蜜月。對於新郎Eric，小環讚不絕口說：「如果100分滿分，我畀佢嘅分數係無限額。」
昨日傍晚約5時，一對新人在律師見證下完婚，其後兩人應傳媒要求步出酒店長樓梯拍照，小環大爆Eric在宣讀誓詞時感動流淚，她說：「我自己就眼濕濕，Eric好緊張，每個步驟要律師提醒。宣誓完畢全場叫我蔡師奶，我先知自己真係結咗婚。」
誓要做智慧師奶
小環表示最感動Eric的愛的宣言，她說：「佢話會愛我一生一世，呢次婚禮，佢為我做咗好多嘢，場地仲有張為我而設嘅港姐凳。」成為蔡師奶的小環仍會兼顧幕前工作，她說：「老公叫我唔好咁辛苦，但會繼續拍嘢，做個美麗同智慧並重嘅師奶。」
採訪：比華利、卓美娟、王崇穎、張俊銘
攝影：陳志嵐、葉君海
嫁妝小八卦：金鈪鑽飾閃耀全場
每當新娘出嫁時，身上必定會佩戴不少名貴嫁妝，務求閃耀全場，其行頭也成為賓客的焦點。昨日榮升蔡太的譚小環，穿上裙褂離開酒店出發到男家斟茶時，身上佩戴了不少金器和鑽飾，計有三對龍鳳鈪、一對鑽石耳環、一枚鑽戒、一條壓花組合的金鏈和金鏈配翡翠吊墜，估計全部總值約六位數字。
