王賢誌早排不滿資歷比自己淺嘅崔建邦可以做台慶司儀，炮轟無綫總經理陳志雲偏私，又喺日前向本報大爆無綫慫恿藝員整容，引起圈中好大迴響。
為咗安撫王賢誌，上個月陳志雲約佢食咗餐私人飯局，估唔到王賢誌爆完整容內幕之後，陳志雲唔嬲不特止，仲專登搵王賢誌擔任自己新節目《志雲上素》第一集嘉賓，親自煮齋菜畀佢食，等佢心平氣和一下。
提供渠道吐寃屈
節目美其名講素食，但其實係畀班唔開心嘅藝人上節目吐寃屈「上訴」，之後畀啲齋菜佢哋食，等佢哋心境平和番啲，唔好再鬧無綫之外，更大收宣傳之效，陳志雲呢個一舉多得嘅做法，真係唔到你唔服！
《志雲上素》其實係關菊英主持嘅新節目《開心聊齋》裏面其中一個環節，今個月24號開始逢星期一晚7點播出，陳志雲今日中午會同王賢誌錄影之餘，佢仲安排埋第二集嘉賓崔建邦出現，呢幕場面，肯定精采過劇集大結局！
