孫藝珍近日忙於同韓劇《不良家族》男主角金明敏拍攝電影《無防備都市》，雖然至今拍咗一半都唔夠，但片商已急不及待公開海報造勢。着住黑色連身裙嘅珍妹盡展美態，但原來一切都歸功於美術指導，平時佢嘅衣着品味真係不敢恭維。
雪人通街走
有網友公開幾張珍妹亂着衫嘅照片，阿Deep睇完都嚇咗一跳，唔知點解佢可以襯得咁核突！珍妹似乎好鍾意着長靴，但好多時同上衣極唔襯，例如佢身穿短袖線衫，但無喇喇配條花哩花碌嘅裙仔，再撞對有毛毛嘅長靴，簡直係將一年四季嘅服裝擺晒喺身。
珍妹又試過着條硬淨皮裙，令臀部大咗幾個碼；又着過勁鮮色或勁累贅嘅衫影相，搞到變咗娘精，完全冇美感可言。另外，阿Deep都知道韓國冬天好凍，但珍妹戴晒冷帽、厚頸巾同羽絨褸，十足個會走嘅雪人咁。好多網友都勸佢得閒畀心機鑽研穿衣之道，唔好再着得咁難睇喎！
網址： http://news.empas.com/board/bbs/read.html?b=star&a=165744
版主：網盜王尊尼Deep
本欄逢周一至五刊出