九月七日本欄講及「入住輪候似難民」，五位朋友睇完，特別來電提供，其中兩個故事可以當做笑話睇。
馬主V嘅朋友於開幕日到某酒店參觀，走入㗎啡室「避難」，因為賭場內太多人也。㗎啡室內有十幾個「企堂」，人多勢眾，但講嘅廣東話唔多純正，一聽而知係外省人。呢位朋友叫夥計：「一杯奶茶。」十五分鐘後，奶茶未至，於是再叫喼頓埋嚟：「對唔住，我杯奶茶未到，唔該跟一跟。」再過十分鐘，有茶嚟嘞，不過係一杯中國茶，味道似普洱，喼頓跟住送上一小杯煉奶，果然係奶加茶，仲唔係奶茶？馬主V轉達朋友之言，笑到架架聲，話絕對冇誇張喎。
外滙C嘅理髮師到某酒店趁熱鬧，下午三點checkin，九點先至有房，入到房間，平時五星酒店房間一定有之浴室用品如洗頭水，全部欠奉，房間小雪櫃空空如也，仲未有飲品、小食在內，惟有自己走落去「買水」，順便賭幾鋪。晚上一宿無話，次日checkout埋單，櫃台員問：「請問有冇飲用房間雪櫃內之飲品？」理髮師答得好肯定：「冇呀！」櫃枱員之後再問：「根據報告，雪櫃內嘅飲品全部冇晒喎？」理髮師為之目瞪口呆。
地產C係澳洲地產經紀，來電話：「唔好理某酒店啲蝦碌嘢住，有咗某酒店之後，附近一帶，所謂嘅豪宅全部漲晒價。」有酒店全景嘅，特別值錢，附近一個盤二百幾個單位，面積二千呎到五千呎，全部賣晒，呎價由八千到一萬，大業主賺咗幾十億，真係多得酒店唔少。你如果到澳門買豪宅，記得最新landmark，睇唔到呢間六星酒店嘅盤，你唔好買。」
咁巴閉？乜嘢人到澳門買咁大間屋呀？地產C話：「地球村人士囉，來自美國、歐洲、中東，我哋祖國都有，買家置業後，一年頂多住一頭半個月，其餘時間空置不用，花幾千萬買件收藏品之嗎，買幅名畫咁上下啫。其他澳門住宅，係澳門人住嘅，唔會升得去邊。」