車路士領隊摩連奴以軍紀嚴明見稱，一直強調球員要保持健康形象，偏偏愛將艾辛隱上瞞下走去同啤酒品牌健力士（Guinness）簽約，日後分分鐘令兩人關係決裂；但我求大俠反而關心佢遲啲，有冇機同另一啤酒代言人李連杰，合作拍廣告耍太極！
「怪獸」艾辛其貌不揚，毫不瀟灑，廣告商寧願搵林伯、泰利等，都甚少打佢主意，或因而令佢酸溜溜，竟然大膽到瞞住摩帥，做咗黑啤品牌健力士嘅非洲區代言人！
艾辛私下接啤酒廣告
健力士呢隻啤酒原來喺非洲甚受酒徒愛戴，近期就錄得17%嘅增長，為進一步擴大市場，該公司搵咗艾辛幫手宣傳，遲啲就會有佢「嘜頭」嘅海報面世！後者日前表示：「能夠成為健力士首位足球員推廣大使，我極之興奮、自豪，可以話係非洲足球史上重要一頁（唔知點解關非洲足球事？），但願自己嘅影響力日後可以同耶保亞、韋亞平起平坐！」
勢同摩佬鬧不和
然而，艾辛秘密「𢱑真銀」就可能觸發佢同摩帥鬧不和。事關摩帥希望旗下球員場外保持健康形象，但係啤酒呢家嘢就係球員大敵，飲得多既有「啤酒肚」，若然一下唔小心變咗酒徒，更可能步阿祖安奴後塵，連球會體檢都酒精含量超標！
我求大俠唔係想幫艾辛講說話，只不過健力士歷來拍下嘅廣告都有不俗嘅反應，並多次拎得歐洲嘅廣告大獎，甚至有研究指出適量飲黑啤，仲對心臟有益㗎！
「搏擊王」李連杰早前亦喺另一個牌子嘅啤酒廣告大晒罕見嘅冧女眼神，話唔定不久將來，艾辛同「搏擊王」交手，或者一騷「另類」男人味……當然，亞洲觀眾受落與否則屬後話！