今年係童軍運動一百周年，童軍係國際性嘅大型組織，唔少名人參加。
童軍之友多名人
聽童軍總會嗰邊講，合和（054）主席胡應湘、李嘉誠基金會董事洪小蓮、永隆銀行（096）副董事長伍步剛、東泰集團主席李東海，同埋警隊前一哥許淇安，全部都係童軍之友！
就好似噚日喺一個童軍總會嘅活動，華華就見到哥頓胡應湘同伍步剛，仲有超人李嘉誠嘅得力助手洪小蓮。家陣除咗一年一度長實（001）股東會先可以見到佢面，平日都好少有機會見到洪小蓮。既然機會難得，華華梗係上前同佢傾兩句。身為童軍總會秘書嘅洪小蓮話，自己冇真正做過一日童軍，但就同童軍有好深嘅淵源。
話說，當年洪小蓮仲喺長實幫誠哥賣樓時，已經幫童軍總會搵新血。佢同華華講：「當時嘅物業管理公司，旗下有成六萬幾個住戶，因利成便，就搞咗個大型嘅童軍招募活動，結果成功踢咗唔少新丁入會做童軍。」諗番起當年做搞手，佢就笑晒口，「個活動令到童軍嘅人數，有好明顯嘅升幅㗎，但實際有幾多人呢？就真係唔記得嘞！」
仔女自小「踢」入會
本來華華想問洪小蓮點解「踢」咁多人入會，但自己又唔做童軍，但未開口佢就已經話，自己兩個寶貝仔女，早喺七、八歲嗰陣已經做咗童軍，家吓佢兩個已經出嚟做緊嘢。講仔女經洪小蓮仍不忘唱好話：「做咗童軍之後，兩個細路自信心大咗、承擔力多咗、判斷力同埋決斷能力都高咗。」
嗱，單睇洪小蓮為童軍會吸納咁多新血，到今時今日講嘢都仲咁sell得，你就知誠哥當年幾咁有眼光，識得搵佢返嚟賣樓。
[email protected]
哥頓煲燶飯
前嗰排講開屏風樓唔環保，哥頓胡應湘撐「寃家」超人李，認為政府批咗就唔應該改。噚日，哥頓又再撐場，今次撐嘅係童軍總會。話說香港童軍總會加入「持續教育院校聯盟」，噚日簽合作協議備忘錄，身為童軍總會榮譽會長嘅哥頓，梗要撐場做主禮嘉賓。
哥頓同華華講，佢中學嗰陣做咗6年童軍，最記得就係同班童軍仔一齊去露營，佢處男下廚，負責煮飯，結果煲燶飯，搞到成班人𠵱嘩鬼叫，最後要食飯焦，認真多得佢唔少！
講番童年往事，哥頓笑笑口話：「唔好話當年咁細個，就算今時今日，頭都白晒、仔都大埋，咁耐以嚟真係未煮過一餐飯。」睇怕「無飯主席」都非佢莫屬！
佢仲話，童軍雖則冇教曉佢煮飯，但就令佢學識合群，皆因一大班人去旅行露營行山，teamwork好緊要。