祖國果汁一哥滙源（1886）前日派成績表，唔計上市嗰陣集資得嚟嘅兩億利息收入，實賺億幾，話好又得，話唔好亦可以。Well，總之噚日解畫記者會都無俾傳媒插，事關大家嘅焦點已經去咗副總裁毛天賜（MatthewGeneMouw）嗰度。
懷疑「講大咗」
絕對唔係因為靚仔，亦唔係因為佢啲普通話流利過華華同一眾行家，而係因為上個禮拜，佢懷疑「講大咗」，向路透社透露滙源未來3至5年，營業額可以升4倍，即係升到100億人仔，咁路透社又咁有江湖地位，各大小行家梗係照例「引述」！
正當大家有懷疑，但又照引述嘅時候，毛總噚日就澄清：「100億不是一個預算，中國市場有這麼大的機會，我們只要抓緊這機會，公司只要維持增長，就很有機會達到……100億不是一個具體預算！」照咁講，好明顯係路透社個記者聽錯囉！
Bytheway，噚日有記者叫錯咗毛總做毛主席，好彩得主席朱新禮幫手解圍，話毛總最多只係有毛澤東思想，而佢啲「毛」只係一毛不拔的毛……睇嚟，滙源幾位管理層係時候學吓咩叫慎言！