女子世界盃噚晚喺中國上海揭幕，衞冕嘅德國女足以11:0大勝阿根廷，平均8.2分鐘就有1個入球，睇波嘅觀眾高興，捧德國隊更高興，不過對馬會以及各大小莊家可能係一場噩夢開始。
德國女足同男子隊一樣鬥志十足，憑3屆世界足球小姐佩蓮絲同中場史美錫各演帽子戲法，以11:0大勝阿根廷，雖然較男子隊早前喺歐國盃外圍賽以13:0大勝聖馬力諾略為遜色，但已經創出女子世界盃決賽周最大比分嘅紀錄。
「主其他」波膽熱至4.8倍
馬會其實賽前已經想明哲保身，只開「主客和」，冇開「讓球主客和」，望減低風險，不過冇「主勝」買，球迷就專攻「主其他」波膽，由6倍打到落4.8倍。而且馬會又估唔到形勢會咁一面倒，今仗提供即場投注，當德國贏到4:0後，「主其他」已經得番1.03倍，到德國贏5:0，即場波膽宣佈封盤。
「即場大細」重災區
馬會今次輸錢另一重災區，就係「即場大細」；馬會操盤手可能以為上半場領先5:0的德國見好就收，下半場繼續開「即場大細」，雖然中位數最後調節到9.5球，入球「大」更只得1.3倍，但無情嘅德國入到11球，下半場至出手球迷，追「大」都可以贏多3、4注。
揭幕戰已經「輸鑊甘」，莊家都咪話唔驚，今晚亦都有美國對北韓、瑞典對尼日利亞呢啲強弱懸殊戲碼，如果繼續大炒風，唔知馬會提議開出女子世界盃盤口嗰位仁兄，使唔使「孭鑊」呢？