城市人，乜都講環保，如政府提倡「BYOB」（BringYourOwnBag）減少用膠袋，停車熄匙，仲建議冷氣溫度保持開25.5度。好！既然咁齊心，不如手機都撈過界講環保！太陽能充電手機，早兩個月已經聽聞，今次玩盡啲，充電底板內置於機背，唔使駁住條USB，隨時翻轉即叉。但筆者苦試五粒鐘，電池仍停留喺第一格，有幾實用唔敢多評，不過Concept好，講環保，我支持！
記者：陳國輝
攝影：陳偉強
Model：Anne
環保手機有前科
「死」後可種出花
大多數手機扔咗就變成堆填區廢物！英國科學家研究出用手機外殼種花的技術，只要將手機埋喺肥沃嘅泥土，外殼便自動分解，入面嘅種子更會發芽，長成向日葵。
外殼可回收再用
生產越多塑膠，就等於製造更多污染。早前，日本NEC與UNITIKA共同研發出一種「生物塑膠」外殼，呢款型號為FOMAN701iECo的手機，特點係外殼可被回收，循環再用。
紙手機用完即棄
如果手機變到好似一包紙巾，你話有幾好？有外國公司曾發表一款叫PaperSays的概念紙手機，原理同環保紙冇分別，用完即棄，回收後亦可循環再用，不過仍然係紙上談兵。
機背雙叭 聲靚歌甜
一般國產雜嘜機都係聲大夾惡，不論開機、關機都要嘈到坼天，聽落仲有啲刺耳，令人好唔舒服。ZT321竟難得擺脫到呢個問題，筆者嘗試播幾首MP3歌，喺室內無人環境下，聲音調到中間已經夠晒靚，人聲唔沙，音樂亦唔覺得坼。當然想享受更靚音色嘅話，不如駁埋跟機送嘅USB耳筒欣賞啦！
可惜，其他多媒體功能都不值一提。如影相鏡頭就停留在盤古初開嘅30萬像，試問，今時今日仲用640×480解像度，可以做啲乜？另外，ZT321貴為國產成員，卻欠缺一般大陸機「應有」嘅雙卡雙待功能，僅支援一張SIM卡，競爭力固然較同級機比下去。若大家只貪求太陽能充電器夠新穎，又方便，$1,000左右售價一試無妨。
其他功能
特製底殼 見光充電
同上次一樣又係國產牌子，但呢款ZT321就簡單得多，跟機附送兩款底殼，其中一塊就嵌入太陽能充電底板，見光會即時吸收能量，然後輸往電池再釋放到手機使用。
實際充電嗰陣成效又點？筆者嘗試將手機放晒電，再用室內燈光照射ZT321達5小時，結果電池依然停留喺第一格，沒任何顯著變化，當我繼續播片、播歌嗰陣，冇幾耐已出現電池不足嘅告示，可見用室內燈充電成效唔大。值得留意係，雖然用太陽光直接照射效果會好明顯，但注意若電池長時間暴曬，有可能引致機身過熱，甚至乎發生短路或爆炸。究竟太陽能呢種天然能源是否適用於手機？仲好值得懷疑！
PROFILE
制式：GSM雙頻
體積：108.8×48.7×17.6mm
重量：108.6g
通話時間：120分鐘
備用時間：150小時
主要功能：2.4吋TFT筆觸式屏幕、藍芽、來電影片、MP3/MPEG4播放器、30萬像素相機、支援microSD卡
查詢：囍（23915552）