家陣英超打到如火如荼，華華周不時俾班損友call去酒吧睇直播。波係要成班人先好睇嘅，大家可以傾吓波經吖嘛。
前排見到Now電視業務董事總經理梁德昇（圖），收到風佢同華華一樣捧阿仙奴，即管問吓佢邊隊英超有冠軍相，點知梁董咬牙切齒話撐硬曼聯！吓？收錯風㖭。
佢話：「雖則曼聯開季開得唔好，但家吓只係季初，遲啲應該會漸入佳景！」佢仲話曼聯之外，都鍾意阿仙奴。哦，冇收錯風！不過，對於億萬大軍車路士，佢就冇乜興趣，事關成隊人都係用錢買返嚟，雖然粒粒星，但冇teamwork，好似差咁啲！
講開英超，梁德昇話，自從喺公司個studio睇咗高清電視畫面之後，就唔可以再忍受屋企部老爺機，所以近排四圍蒲，去揀部新嘅Plasma，仲集中揀50吋大電視，因為咁先可以好清楚咁同時睇晒4個畫面喎。