馬德鐘在內地參與節目《舞動奇跡》大展舞藝時，被拍到與湖南女郎約會，為免再次激嬲老婆，昨日他在港出席祝捷會時，專誠派發當晚飯局的照片，急急澄清緋聞女主角是內地報章的編輯。至於馬德鐘另一位緋聞女友郭羨妮，昨日也大展舞技。
無綫早前派藝員到湖南參與《舞動奇跡》比賽節目，經過舞鬥後，除了曹敏莉和陳敏之出局外，郭羨妮、馬德鐘、周家蔚、黃長興、楊思琦和袁偉豪等均順利過關，今日有份參與的藝員將再出發到湖南，昨日無綫為鼓勵士氣，在將軍澳舉行祝捷會，各藝員展示學舞成果，擺出貼身高難度舞姿，周家蔚講述辛酸經過時還眼泛淚光。
「監製都知我食飯」
馬德鐘一直緋聞不絕，即使身在湖南也被發現夜會湖南女郎吃飯，又指他被監製照肺，昨日馬德鐘澄清說：「所謂嘅湖南妹係湖南一份報紙嘅編輯，佢哋想搵我做專訪，當晚係一枱人食飯，我都有影相，可以畀你哋睇，而且我冇俾監製照肺，當日我唔使排練，監製都知我出去食飯。」問馬德鐘緊張澄清是否怕激嬲老婆？他說：「我要做啲嘢保衞自己屋企，報道出咗我都有同太太解釋，加上我唔喺香港期間，有狗仔隊去我屋企拍門，我太太都好嬲。」對於郭羨妮返港時踢爆他離隊，馬德鐘說：「我要飛去廣州做嘢，我工作只同工作人員交代。」
另外，黃長興在祝捷會上抱起曹敏莉時，竟抱着她的臀部，引起全場嘩言，此時黃長興才慢慢將手移至她的腰間，事後曹敏莉說：「冇嘢嘅，跳舞有好多誇張動作，我同老師嗰啲動作仲親密。」
吳家樂兩個夠晒數
至於郭羨妮在內地被指與楊思琦不和，死黐陳敏之，昨日二人否認此事。吳家樂昨日則親證太太懷有四個月身孕，預產期在明年2月，可謂三年抱兩，他說：「生埋呢個都夠，主要唔想個女悶，有個伴，對我哋嚟講仔女都冇所謂。」
此外，郭羨妮跟曾傳不和的馬浚偉，將於11月22日至25日於文化中心合演舞台劇《王子復仇記》，問他們可擔心再傳不和，馬浚偉說：「嚟緊一星期要排練三日，我拍《舞動全城》之後鍾意咗跳舞，仲想約埋郭羨妮一齊去學。」
採訪：卓寶花、魯萍
攝影：林德雄
