九月一日本欄寫「馬萬靈過大海」，入到馬場碰到馬主Ｎ就俾佢鬧：「喂，RacingWorld嘅中文名係《賽馬天下》，唔係《賽馬世界》，你點會寫錯㗎！黎老闆冇鬧你咩？」哎吔吔，一時快手，寫錯咗，鎖你鎖你！一九九○年黎老闆收購《賽馬天下》，創辦《壹週刊》，不過《賽馬天下》係小生意，佢喺九四年就賣番出去，怕且黎老闆已經唔記得咗咯。
余伯樂又澄清，佢在崇基讀中文系之時，並非在下課後行去沙田馬場，而係走堂去咗馬場，後來俾人篤背脊，講師唔俾佢考學位試，所以輟學喎。不過到咗現在，左丁山仍然認為余伯樂啲中文程度，勝過不少中文系畢業生。
講起余伯樂與中文系，忽接一讀者電郵，一位讀者何送上兩首一位中大歷史系學生二十二歲時寫嘅七言絕詩與五言古詩，時維一九五七年，唔怪得啦，二○○七年嘅畢業生相信唔會寫得出嘅！七言絕詩（畢業有感）云：「灘頭獨步聽疏鐘，隔岸雲山煙雨濛，四載浪遊成底事，重回塵邑寄塵踪。」
五言古詩（月遊烏溪沙）：「杯酒迎新月，長歌放中流，短棹翻銀浪，輕風送客愁；漁火明復滅，思緒半沉浮；煙花影素月，共堤泊小舟；山山饒書意，處處賞春潮；此夜應常在，此慶願長留；孤峯何默默，江水獨悠悠；疏林散清影，乘月漫山遊。」
作者應該係崇基學生，幾十年前崇基生在烏溪沙迎新，每年有渡海泳，由馬料水沙灘（現火車站外）游過去烏溪沙，又時興扒艇仔在沙田海（今沙田馬場至馬料水）飄浮，都唔知幾爽。賓架Ｐ恩師莫凱教授係五十年代崇基學生，佢話自己有錢買咗隻小艇，常與女同學出海扒艇。佢啲學生之大惑不解啫，就係以佢咁好條件，點解會追唔到一位崇基女生，竟然終身不娶呢？
五十年前大學生之中文水平，好過今日大學生好多。不過今日之大學生對電腦及數碼玩意之認識，係前幾代學生遠遠不及嘅，前人用文字表達情感，今人用影像暴露感覺；再過五十年，又會係乜嘢光景？