港府入市增持港交所（388）成為城中熱門話題。
政府是否應該入市？為何選擇此時此刻火上加油？真正目的何在？為甚麼與內地股市加強合作發展如此重要議題，所以由一小撮人（你信唔信係財經插班生一個人）決定？中央是否示意這樣做？是否「北水自由行」列車出現故障，港府為穩定「民心」而毅然出手？是否有人好大喜功？是否還有說不出口的內情？
上述連串問題，仲難答過部份新穎且複雜的金融衍生工具產品爆煲後，一眾人等在追究「誰之過」，最終會否又是個謎？會不會有人要揹鑊，無從回答！但其複雜程度，足可與次按問題互相輝映。
冠一不想去揣測箇中動機，只知道這個所謂「國際ATM金融中心」已變了質，「港股直通車」未開已搞成咁，如果成事，這ATM機肯定俾人㩒到儍。
「牆頭草」港股果然識看風駛𢃇。美股上周急挫，誘發日韓股市昨分別狂瀉2.2%和2.6%，澳紐、星馬泰、雙印等亞太股市亦跟隨滑落，只有偉大祖國股市不受影響，港股雖然收報升17點，但在開放的亞太市場，已是鶴立雞群矣！
中國有呢個醒目如斯嘅叻仔，怎不老懷大慰！真係叻咩？這個當然，只一隻港交所，無論是有人被「夾」或引來狂蜂浪蝶，升幅已足夠頂住半邊天。
奇怪的是，點解淨係炒呢隻？難道與內地加強金融合作，靠港交所便可圓其宏願？