住在東京新宿區ParkHyatt，認真舒服，與職員講英文，有得溝通，搵埋肥仔K講埋日文，更加唔會LostinTranslation。響日本講英文，一向難搞，賓架L公子到東京一行，聽老友介紹到一家壽司小店，未入門就用英文發問，竟然俾人請番出嚟，日本老闆猛講：「Close，Close」唔做L公子生意。
識得日文，日本人特別好招呼！肥仔K已經係東京通，對平民場所尤其熟習，橫街陋巷啲拉麵店佢都識得去，去親必好，譬如去到原宿表參道近原宿車站一間著名拉麵店，人龍由二樓排到落地下，肥仔K立即帶左丁山行多兩個街口，在Wendy's漢堡包店轉左入咗一條橫街，行幾步走入一間小店，啲拉麵一樣咁好食。與佢到新宿伊勢丹六樓嘅「壽司清」食壽司，甚好招呼，長者女招待極為親切，送上幾件toro，好似特別肥美。
日間食拉麵，算係便宜（以日本物價而論），因行路太多，晚上不如留在ParkHyatt，到三十九樓嘅日本菜餐廳「梢」（Kozue）食燒牛肉便當。侍應送上一個小小炭火爐，六件牛肉放在兩塊蕉葉內，三件牛肉放在一條菜上面，牛肉面鋪上一塊紅辣椒。束起蕉葉，用兩條竹籤打橫刺實，放上小炭爐烤之；日本人用於食物賣相之心思，遠遠大於我哋之想像，心急人如左丁山者，望住個小炭爐，心諗不如廚師在廚房燒好，送出來畀人客食仲快夾妥啦。日本女侍應大概睇得出香港男人不懂情趣，不識慢慢燒，慢慢吃，飲番一小杯純米大吟釀，與女士喁喁細語之文化，走埋嚟將塊蕉葉打開平放，拿走辣椒與菜，啲牛肉好快就熟，肉香四濺，急不及待放入口中，嘩，幾乎入口即融，果然係頂級牛肉。可惜吖，人在冷氣餐廳中，身在酒店大樓之三十九樓，下望東京璀璨夜景，城市氣氛太濃厚，閒情逸致消失於無形，吃牛肉都心急過人。假如換上黑澤明式電影場景，人在鄉野雪地平房，圍爐取暖，用小炭爐烤蕉葉牛肉，與伴侶共傾樽，咁就不知時間為何物，大把情趣咯。