古巨基前晚喺紅館舉行第二場演唱會，吸引俞琤、鄧達智同吳家樂周蕙蕙夫婦到場欣賞。周蕙蕙舊年初同家樂仔結婚，到咗11月就幫老公生咗個重7磅2嘅BB女，前晚見佢着咗件墨綠色鬆身衫，一見記者仲用個袋遮肚，似乎有啲嘢咁噃！
有咗四個幾月
問家樂仔幾時打算追多個BB，佢開頭仲否認話：「唔會喇。」講到佢老婆好似有咗時，佢仲死撐話：「唔係，佢肥咗啫。」周蕙蕙仲夫唱婦隨話：「係呀，我自己肥咗。」再問佢哋打算幾時生BB，一直否認嘅家樂仔終於承認話：「你哋都睇到啦，有咗四個幾月，仔女都未知，因為未去照，仔女都冇所謂，最緊要BB健康。」
至於基仔前晚就搵咗鄭伊健做表演嘉賓，伊健出場唱《友情歲月》，現場觀眾反應熱烈，佢話：「我呢首歌通常同小春合唱，今次係首次同基仔唱。」
伊健話大家相識係因為拍劇集《笑看風雲》，基仔話：「雖然大家好耐先聯絡，但你永遠係我哥哥，我永遠係小虎，我淨係識攬你，唔識同你打羽毛球。」伊健聞言忍唔住話：「你臨尾都要講我一嘢。」此外，基仔前晚喺演唱會話掂到「小方」，方力申噚日出席活動時話：「冇乜嘢，搵機會掂番佢。我問番設計師，佢話冇可能設計一條有窿嘅褲畀我，後尾幫我補番喇！」
