唔少日本嘅汽車生產商，都會大量採用人氣偶像做代言人拍廣告。無他嘅，當地市場大，顧客層面廣，唔好話淨係男仔鍾意睇靚女，年輕女仔一樣係車界大客仔，所以女仔都Buy嘅靚女偶像自然吃香。就好似今日介紹嘅井川遙咁，雖然佢有份主演嘅《大奧》喺香港唔係咁收得，但睇到儘管年過30嘅佢，依然係咁索爆鏡。
今勻係Honda搵咗井川遙拍廣告，催谷旗下部Life，而TV-CM就分「泊車篇」同今日畀大家睇呢個「今日生日篇」；話說喺廣告入面，井川遙上車時仲係薯嘜儍妹Look，不過落咗車竟然變身索爆靚女，咁神奇？咪就係Honda硬Sell車裏面嘅設備有幾齊有幾正囉！廣告本身無乜特別，不過錶板上提醒井川遙「今日生日」嘅顯示屏又真係好鬼Cute，又有穿透度低的防偷窺玻璃，喺車上變身都好合理啫，睇嚟都好啱香港一眾明星咁喎。
記者：黎頌詩
網址： http://www.honda.co.jp/LIFE/cmgallery/cm03/index.html
