電盈（008）前副主席張永霖前排出咗本新書《成功路》，華華聽聞佢今次留有一手，臨時抽起咗個Chapter，而呢個Chapter係講小小超澤楷嘅！華華梗係要問吓佢傳聞真定假，點知佢居然用超人李嘉誠近排嘅金句：「儍嘅！」贈番華華。仲話：「佢（二少）有乜好講，佢好多嘢俾人寫咩？無啦！」
咁本書賣成點啫？佢講，本書賣得幾好，銷量突破一萬本，但係要寫一本好書，要好耐時間，加上香港版稅收入唔夠開飯，所以都係得閒先再寫喎！
版稅收入唔夠開飯
夠唔夠開飯視乎餐飯有幾貴，對於張永霖嚟講可能真係唔夠，因為佢本來喺上環有間私竇，華華都去過，真係好鬼闊落㗎！但早排業主加租一倍，計過度過，最終決定唔續租。
張永霖話，近排忙完個投資講座，10月會拍住羅大佑搞教育音樂會。退咗休都周身唔得閒，加上暑假兩個女返香港做暑期工，所以今年冇外遊，爭取多啲時間同兩個寶貝女卓凝、卓瑤見面。
佢笑笑口話：「我每個星期都會同兩個女食飯，但就無同佢哋一齊夜蒲。」佢又爆響口，細女份暑期工係佢打人情牌搵畀個女，係義務性質，冇錢不特止，仲要佢津貼使費，旨在畀佢學吓嘢！