香港窩輪成交上周五創237億元新高，雖貴為全球一哥，但逾20家發行商中，如要脫穎而出，當然要別出心裁，有自己賣點。有別其他輪商重金禮聘美女作代言人，又或大灑金錢，鋪天蓋地推出廣告攻勢搶客，瑞銀執行董事兼窩輪掌舵人于正人，卻奉行價值投資，堅持以專業形象、產品價格爭取散戶歡心，結果短短兩年內晉身六強之列。
「𠵱家投資者越趨精明、醒目，想聽多些專家意見，與其大搞噱頭，倒不如實際地開靚價，自然招引一班長期捧場客。」于正人分析其推擴策略。「公司品牌及形象已獲外界肯定，尤其散戶熟悉的港股策略員陸東，更增添產品叫座力，衍生部門亦可經由私人銀行及基金部門攞平貨，變相開價亦可好啲。」
「輪商對冲不足亦會蝕」
對於外間指玩輪十賭九輸，他反擊指窩輪並非是零和遊戲，「有時市況逆轉及股份大波動，輪商做唔切對冲及對冲不足亦會蝕錢。如果真係騙人，又點會日日有逾百億甚至200億成交，你咪當投資者儍啦。」
于正人現時會親任「接線生」，直接解答散戶查詢。「散戶已越見成熟，唔會只問冧巴買輪，不過部份人用炒股方法炒輪，長揸唔放，結果由贏變輸」。
親任接線生解答散戶
除直接落場與散戶傾談，他亦走遍中環以至油尖旺經紀行與交易員接觸，希望了解投資者需要，「最緊要貼市，如去年中資金融股旺場，我們主力推出相關產品，亦大受歡迎。」
瑞銀2005年重返窩輪市場，不過擔任開荒牛的于正人，卻已有9年衍生工具工作經驗，更屬少有考取特許財務分析師（CFA）牌照的窩輪代言人，名副其實以實力取勝。