台灣有「獲利王」之稱的股王宏達電（HTC）年賺60億港銀，踏入十周年，梗要搞大佢。上個禮拜三就喺台北晶華酒店開生日會，咁大個party點少得華華。
搞手確有心思，喺會場外面搵咗好多捏麵粉、竹蚱蜢等等嘅傳統台灣小玩意；呀，仲有華華好耐都冇食過嘅麥芽糖，仲以為去咗廟會㖭。
香港大企業都鍾意請明星去賀壽派對，舊年新創建（659）旗下富城集團就請咗陳潔靈獻唱，宏達電就請咗小西門布袋戲同心心南管樂團表演。宏達電老細周永明好識做，表演完即刻封番封利事畀佢哋。
當晚高潮位喺送禮物環節，周永明送咗三個布偶畀高通執行長PaulJacobs、微軟高級副總裁PieterKnook，同埋德國電信創新產品長ChristopherSchlaffer。話得高潮位梗唔會行貨，三個貴賓收到嘅布偶都唔同，分別係清朝皇帝康熙、鐵面無私嘅包公，同勇猛善戰嘅趙子龍。不過，你估呢三位老外識唔識得三個布偶嘅威猛來頭呢呵！