潮流興集體回憶，無綫都搵番好多舊將回巢，繼袁詠儀同陳玉蓮之後，冇喺無綫兩年嘅廖啓智會喺今個月中重返娘家，接拍一部民初劇《大冬瓜》。之前智叔因為做得唔開心而離開，幫有線主持節目，日前馮仁昭同智叔傾電話時，佢話：「當日離開係自己決定，佢哋覺得有個角色啱我做，啱啱我同有線合約滿咗，今次我同TVB係部頭形式合作嘅。」
趙雅芝或回巢
講到《大冬瓜》部劇，原來同之前林文龍、郭可盈做嗰齣《十兄弟》一樣，都係屬於一啲神怪題材，無綫見《十兄弟》好收，所以搵咗1958年張瑛同羅艷卿主演嘅粵語長片《大冬瓜》嚟翻拍。智叔喺新劇飾演一個識得法術嘅神仙大冬瓜，而陳錦鴻同蘇玉華就扮演以前張瑛同羅艷卿戲中兩公婆角色。
另外，馮仁昭聽聞無綫都有搵趙雅芝同呂良偉傾過，咁多好戲之人回歸拍劇，對觀眾嚟講實在係一個好消息。
