羅氏針織家族後人羅可旋上月早產誕下「七星」孖仔，剛滿月的她即火速收身，昨日現身Dior化妝品活動。羅可旋由於開刀分娩，打了三支麻醉針，現時記憶力十分差，而孖B因早產關係，身形較細小，現仍需留院觀察，羅可旋謂BB在睡覺時會不懂得呼吸，令她驚慌又心痛，故正積極裝備自己，接受護理嬰孩的特別訓練。
羅氏針織後人、即時裝品牌Ztampz揸弗人羅可旋上月早產，開刀誕下「七星金豬」孖仔，剛坐完月的她，昨日在四季酒店出席Dior化妝品活動。
「一個瞓箱」
現場所見，羅可旋身形十分纖瘦，她說：「剛坐完月，由於開刀未做得運動，又未補得住，𠵱家仲瘦過以前，今次生BB好辛苦，本來諗住順產，點知痛咗30幾個鐘，最後要開刀打咗三支麻醉針，所以記憶力好差。」她透露孖B仍需留院，她說：「𠵱家佢哋得4磅，一個瞓喺箱，一個唔使，所以我成日都要去醫院探佢哋，都有啲心痛，不過始終醫院係專業，雖然BB過咗危險期，不過有時佢哋瞓覺會唔記得唞氣，都好驚。」
羅可旋表示為了照顧孖B，已多聘一位工人，她說：「自己都要接受訓練，因為有時佢哋飲奶，塊面會變紫色。」問到大女會否妒忌，她說：「雖然BB未返得屋企，不過已經同囡囡講，第時屋企會多咗兩個BB，佢都好鍾意BB。」
再谷胸上陣
此外，劉心悠透露十分注重臉部護理，問她最滿意五官那個部份，她說：「因為我個鼻生得高，試過有人問我係唔係假，我自己都有懷疑自己有混血血統，仲俾媽咪鬧。」近日頻頻以性感打扮出席活動的中華小姐李鑫淼，昨日又以一襲金色裙谷胸上陣，她以普通話說：「沒關係，最重要是健康的性感。」問近日有甚麼工作，她表示正接洽了數個廣告。
採訪：MaggieLaw
攝影：ChanChiLam
