陳太今朝會宣佈可能係佢政治生涯中最重要嘅決定，就係決定參加立法會港島區議席嘅補選。以陳太咁注意形象，由衣着髮型到accessories配搭，陳太一定會秉承佢一絲不苟嘅作風，但係考慮到參加直選之後，八方建議阿太，適宜用一個大眾化一啲、唔好咁精英嘅形象亮相，因為咁樣可以攞到更多草根市民嘅認同。
揀衫要配合競選顏色
如果要八方幫陳太挑選戰衣嘅話，就奉勸陳太唔好着佢最心愛嘅靚靚旗袍出場，着番啲簡單些少嘅行政套裝就得，當然啦，顏色唔可以太平淡，紅色雖然唔錯，但仲要諗埋係咪配合用嚟做競選顏色。計八方話，梁家傑嘅粉紅色同卿姐用開嘅黃色都唔錯，顏色搶得嚟又唔太刺激。
陳太會喺灣仔小童群益會擺陣，同06年佢開記者會話參加7.1遊行屬同一地點，選擇喺「主場」作重要宣佈，兼夾回應記者窮追猛打，少啲精力都唔掂，但照計陳太都可以發揮自如。而為咗加添信心同顯示叠友支持，陳太嘅核心智囊必然齊齊亮相撐場，一眾好友如馬丁、飛哥，同泛民中人，當然唔少得，而作為陳太背後重要支柱嘅夫婿陳棣榮，就唔知會唔會現身喇。
陳太今日心情當然靚絕，四萬式笑容例必全場贈送，但奉勸陳太仲要留番啲氣力，應付嚟緊落區洗樓拉票，同埋一旦當選後，點樣做好議員呢份工。
至於陳太嘅對手葉劉，今日大概會睇住電視直播，留意陳太一舉一動伺機出擊。不過計八方話齋，與其觀戰倒不如主動出擊，出盡力試圖扭轉全城焦點都放喺陳太身上嘅困境。
葉劉可以做嘅，包括朝早向傳媒發出緊急採訪通知，趕喺陳太之前開記招，除咗公佈參選之外，仲可以搞搞花臣，例如話自己蜜運成功，雙喜臨門之類。
急call中央放水溝淡
如果擔心咁都仲未夠吸引，葉劉仲可以急call中央，由阿爺即時公佈重大消息。乜嘢重大消息可以同陳太參選抗衡？落實「北水南調」港股直通車安排啦，咁就或者可以撈番一個半個頭版位置，溝淡陳太參選嘅衝擊。如果陳太、葉劉都開記招，到時邊一方面多啲電視直播，邊個場人氣旺啲，都可以顯示行情高低。
講到最後，例牌嗰句：以上內容都只係八方模擬嘅情景，如有雷同純屬巧合。當然，根據《蘋果》委託港大民意研究計劃做嘅民調，陳太會選贏呢個結果，會係好多香港市民嘅共同睇法。