小妹喺香港未搭過昂坪360，點知啱啱去咗台北，就一嚐搭貓空纜車嘅滋味，山過山共四個站，歷時17分鐘，單程車費只係50蚊台幣，大約係港幣12.5元，價錢平過360好多。不過，我今次想搭貓空纜車睇日落嘅滋味，但係喺唔適當嘅時間搭車，唔單止睇唔到日落，最慘係乜都睇唔到嗰隻。天堂與地獄真係一線之隔。
話說我同男友下午5點幾搭捷運去到木柵線總站嘅動物園站，行去貓空纜車站外，見到有幾十人排隊等買票。我心諗夠時間上纜車，點知排咗半粒鐘到入站內，原來仲要排多四層，仲要逐層樓、逐批人咁放行，結果足足再等咗半粒鐘，太陽都跌咗落山，真係由天光等到天黑。
睇唔到日落都算，最慘係上到纜車，外邊黑到真係伸手不見五指，好彩越過幾個山頭，總算睇到啲部份燈火嘅夜景，叫做有啲安慰，同場仲有個一家三口台灣家庭，個爸爸好浪漫咁講：「在夜點之中乘搭纜車，人好像夜空飛翔。」如果男友好似個爸爸咁浪漫，我就唔使咁𤷪啦。
所以我奉勸一眾姊妹，想搭貓空纜車睇日落，一定要早啲到。
逢周一至周四刊出