禮拜六，孫柏文睇《蘋果日報》財經版頭條新聞，見到政府宣佈增持港交所（388）股份。我想問：「曾特首、曾司長，為乜呀呀呀？」
講控制權。都唔講現有法例規範，政府已經有權去揀港交所董事局過半數董事，即係已經有完全控制權。根本唔可以話為控制權入股港交所。所以再問，為乜入股呀？
講為投資回報。政府為提高投資回報率，賣花旗國債券買股票，此舉我可以同情。不過，絕對唔好買港交所呢啲盈利非常倚賴政策嘅企業。為咗谷高盈利，令政府回報增加，令官員好睇啲，政府就會有龐大誘因去利益輸送，從中一定有人犧牲。第時，如果又有華資股票行喊晒口話好慘，大家知點解。所以再問，為乜入股呀？
借鑑澳門 勿瓜田李下
再講，官員為谷高盈利，為要好睇啲，更加唔會引進唯一可以保證香港金融業長遠繁榮嘅競爭。
競爭有乜好？唔使講咁遠，講澳門博彩業就得。有如今日《蘋果批》高明輝話：「如果當年澳門政府入股澳娛股份，便會製造龐大的誘因，令澳門政府不開放澳門的賭博經營權。」所以再問，為乜入股呀？
唔通，政府真係覺得入股港交所，就係履行「偉大嘅十一五行動綱領」？好多人話，港官常常聽唔明京官說話背後嘅真正意思。從國家一路走改革開放路線，減少干預為大方向嚟睇，今次又一「聽唔明」鐵證。所以再問，為乜入股呀？
今次，相信所有自由市場支持者，都對曾俊華司長非常失望。
金手指網誌： http://phatdat.blogspot.com