臨近中秋，同事隔幾日就收到果籃，老實講，個個果籃都大同小異，呢頭拆嗰頭食，10分鐘內只會得番個籃，同埋條絲帶。不過，噚日華華終於收到個有得食有得玩，而且仲係大家都有興趣拎嚟睇嘅果籃。咁有心思嘅，係即將殺落香港上市嘅阿里巴巴。
咁個籃當然唔係有幾張白表畀大家抽新股啦，CEO衛哲喺張賀卡度話，9月10號大家除咗忙於預備過中秋，仲係佢哋阿里巴巴慶祝8周年嘅大日子。
有得食有得玩
佢仲放咗份遊戲卡畀大家玩吓問答遊戲。問題都係圍繞阿里巴巴，包括阿里巴巴點解叫阿里巴巴（同芝麻開門有關）；阿里巴巴創辦人馬雲第一份工做乜（係英文教師）；阿里巴巴員工平均年齡（大約係26）；最刁鑽嗰條，係9月10日仲有乜嘢要慶祝？
答案係馬雲生日同埋中國教師節！咁有心思，係咪抵同馬生講聲生日快樂呢！