Cringing喺《CNN討論區》話：「我間公司最近請咗幾個見習生，每次帶佢哋同客人食晏，之後都要向客人道歉收場，因為班見習生失禮死人，例如有個見習生居然私自同客人約會；另一個叫咗樽酒，大飲特飲，然後去男廁『借尿遁』玩失蹤。」
唔好淨係顧住玩
美國《財富》雜誌職場專欄作家費希爾回應：「睇嚟你班見習生參加商務午宴，淨係顧住玩，唔知其實有好多正經事要做。」仲提供咗10個有關商務午宴禮儀嘅貼士醒佢：
1.同客人食晏前，應做定功課，先行搜集對方嘅資料。
2.唔好同客人去太cheap嘅餐廳。
3.情況許可應先去客人間公司，接人一齊去食晏。試想想，假如雙方唔係咁熟，只用電話約對方喺餐廳見面，到時可能會唔認得對方。
4.對餐廳侍應要有禮貌，等客人知道你人品好。
5.食物未吞完唔好講嘢，食嘢應該細啖啲，咁樣就可以有多啲時間同客人傾偈。
6.除非客人主動提出飲酒，否則盡量避免，因為酒精會影響判斷力，令人做錯商業決定。
7.唔好詆譭其他公司，因為客人可能同呢間公司有生意來往。
8傾完公事如果冇偈傾會好尷尬，應該諗定啲有趣話題。
9.唔好畀客知呢餐用咗幾多錢。
10.就算客人睇嚟好友善，亦唔應該私下約會客人，咁樣好唐突。