威尼斯人度假村上月底開幕嘅盛況，除咗吸引到唔少平民百姓去趁墟，仲嚇親我哋特區政府嘅領導層。據講，煲呔喺人哋開幕嘅第二日，同三司十二局問責官員開早餐會議時，好嚴肅咁話，威尼斯人對香港構成競爭之大，係佢意料之外，對方嘅旅遊同會展業務嘅威脅已經殺到埋身，佢仲指示班高官應該親身過大海走番轉，感受吓嗰種震撼，全力向人哋學習。
其實，威尼斯人度假村只係金沙喺路氹金光大道嘅第一期項目，嚟緊仲有好多新設施新酒店落成，但開幕之後首24小時已經吸引11.4萬人次，絕對稱得上萬人空巷，入過去嘅人都話好靚，仲大到會蕩失路。呢啲情景，煲呔喺電視睇得一清二楚，但更緊要嘅係，今次唔止係澳門又一個新賭場新酒店落成咁簡單。
早餐會如夢初醒
威尼斯人開幕嘅第二日朝早，煲呔喺佢主持嘅例行早餐會度，好似如夢初醒咁，突然對住所有問責高官好肉緊咁話，真係俾威尼斯人嚇咗一跳，原來佢嘅規模咁龐大，連佢自己都從未諗過。威尼斯人不但會對本港旅遊業構成競爭，仲嚴重威脅本港另一經濟支柱──會議展覽業。煲呔隨即訓令所有司局長，應該親身去睇吓人哋點做。
事後，班高官對煲呔咁緊張都好愕然（八方就對煲呔咁後知後覺好愕然），後嚟有人補充話，煲呔唔係叫成個特區班子組團去澳門考察，煲呔自己亦冇計劃短期內過澳門，只係希望主管有關政策嘅局長去體會吓。
換言之，首當其衝嘅當然係主管旅遊同工商業、兼夾監管貿易發展局嘅商務及經濟發展局；食到正嘅局長馬時亨同貿發局候任主席蘇澤光，係時候過大海，體驗吓威尼斯人嘅「威」力喇。呢幾日肥馬身在澳洲悉尼，跟住煲呔參加APEC會議。
屬私人考察性質
但據八方了解，佢遲啲過澳門考察，都唔會用官式身份，而係私人考察，因為咁樣先至可以觀察得入微啲。換句話講，呢個行程佢要自己科款嚟學嘢。
當然，阿爺叫香港人搞好經濟，財爺鬍鬚曾呢鋪都唔可以怠慢，坐得上呢個位又點可以對威尼斯人嘅威脅置身事外？
做咗旅發局主席嘅田少就向來醒目，佢率先計劃下個月去澳門，同當地旅遊業界商量吓，雙方可以點樣加強合作，搞兩地一站式旅遊，希望澳門分番啲油水畀香港啦。