所謂近廚得食，何況係開「富豪飯堂」嘅太子爺。嗱，香港稱得上「富豪飯堂」嘅食肆唔多，福臨門肯定係其中一家。你知唔知福臨門嘅太子爺徐德強（Duncan）去美國留學，「飛機餐」係乜吖？
阿媽送愛心飛機餐
開估，一盒荷葉飯，另外仲有兩隻鮑魚，應該係到埗煮嚟食。
Duncan同華華講：「我唔係食鮑魚大㗎！」不過，15歲去美國留學嗰陣，Duncan媽咪臨上機『質』咗個玻璃樽畀佢，入面放咗兩隻十幾頭嘅鮑魚，再加盒荷葉飯，眼濕濕送佢上機！
做得福臨門太子爺，除咗食，Duncan仲識煮。佢話喺美國得一個人，所以學識煮嘢。老竇開富豪飯堂，太子爺冇理由煮即食麵㗎，吓嘩。Duncan喺宿舍入面煮嘅係鮑魚，仲搞到成層樓都係鮑魚味。
佢同華華講，烹調鮑魚同燕窩都難唔倒佢，只係俾魚翅考起，因為工序太多。家吓佢時不時都會露兩手冧老婆，但就煮西餐多啲。至於開年同團年，一定返「家族飯堂」食，仲會由佢主持大局，皆因好多時伯爺同阿叔都忙到唔見影！
雖然一身好廚藝，但Duncan家吓搞緊私募基金，唔返屋企幫手住。唔講唔知，Duncan係堂堂上市公司德泰中華（2324）執行董事。佢話，投資同做酒家一樣，要親力親為，冇捷徑！之但係屋企開嘅酒家咁多富豪幫襯，對生意應該好有利。Duncan承認自己係比人哋多啲機會，睇到好多快上快落快無影嘅失敗例子，就係咁學精咗，行少好多寃枉路。
開富豪飯堂有着數
佢仲話，除非係好熟嘅朋友，否則，傾生意好少約喺福臨門，因為好快會被人摸清個底，冇着數。佢第一筆資金係屋企畀嘅，當時佢伯爺同佢講：「攞筆錢當交學費，出去見吓世面學吓嘢啦！」結果，就梗係衰咗啦！不過，佢的確學精咗，起碼知道要攞多啲實戰經驗。
Duncan話：「遲早都會返屋企幫手，到時會專注引進新人才、開拓新市場，但會好小心平衡新舊嘅人及事，因為唔少夥計都做咗幾十年，要顧埋呢班勞苦功高嘅老臣子感受。」
[email protected]