富士掃把佬（Subaru）形象一向勁道十足，水平對向四驅技術做到出晒名，好似部ImprezaWRX咁，邊有人夠膽話佢係斯文車！殊不知富士都湊熱鬧，加入近來熱爆嘅SUV四驅潮流，推出七人SUV，仲要有埋四驅功能兼一改以往辛辣味道，唔講驟眼仲以為係波子Cayenne，不過係日版啫！對我嚟講最正都係佢內櫳變化多，空間夠，載乜都得方便到暈，就算FullLoading坐足七個掃把佬都絕對無問題！
記者：梁美甜
攝影：黃子偉
模特兒：Frankie（PureModel）
富士新品七人SUV
富士掃把佬有名你叫，必經之處例掃，勁力驚人，所以富士車予人辛辣味道，唔係人人啃得落。點知最近新搞作玩埋首部七人SUVTribeca3.0，仲要用上招牌水平對向引擎加四驅技術！外形睇Tribeca黑黑實實，好鬼Executive兼有剛陽味，單看車頭線條同頭冚仲差啲以為係波子Cayenne，Cool到暈。
Tribeca配備3公升水平六汽缸，齋聽以為馬力好強，不過車身有成2噸重，3,000c.c.唔多夠喎！富士梗會諗到呢個問題，所以就為Tribeca配備五前速Sportshift自動波，利用手動+/-轉波就可發揮引擎高轉威力，加上AWD恒式四驅系統，上山跑大斜路都仲得，絕對全天候。
靈活變化至啱狂掃
講到至得我歡心嘅就一定係個尾箱同靈活多變嘅收摺座椅。單以尾廂而言，未收第三排座椅都可以放到幾個行李箱，若然收起第三排椅就犀利囉，誇張啲講，齊腳就可以攻打四方城㗎！再唔係幾個女人瘋狂掃貨，掃到碌爆幾張信用卡都得！但要坐足七個人出遊就有一定難度，因為尾排座椅係兩個獨立位，話就話坐到兩個成年人，不過腳位空間狹窄，對腳唔知伸去邊好，小朋友就應該無問題，牛高馬大嘅人就唔建議喇！
豪華舒適媲美歐貨
Tribeca雖然係富士第一部七人SUV，但由內至外一啲都不遜於其他歐美名牌SUV，好似全車真皮座椅配電動天窗，全家人賞月曬月光一啲都唔成問題。車廂Furnishing同好多四驅SUV相若，好多仲用咗金屬飾邊，雖然唔係電鍍，都大大提高咗時代感；外形上雖不至於有甚麼令人驚嘆嘅設計同用料，但沉實陽剛外形倒也吸引務實型男。Tribeca副水平六汽缸引擎，以慳油為着眼點，啱晒環保大趨勢。
富士Tribeca3.0規格
引擎：3,000c.c.六汽缸水平對向引擎
馬力：245bhp/6,600rpm
扭力：30.3kgm/4,200rpm
傳動：五+/-自動波，四驅功能
查詢：意美汽車（25112727）
