過去兩日揸咗期指嘅好友一定好閉翳，花旗嗰邊上禮拜五跌咗250點，中間嘅時間反彈乏力，多咗人提「經濟衰退」呢幾個字，其實都唔係危言聳聽，花旗樓市醫番都嘥藥費，信貸危機又未解決，裁員潮一浪接一浪，未來消費市道會點，大家都應該諗到，如果諗唔到，諗番香港97之後，「八萬五」威力發揮之後，我哋嘅經濟同消費係點，都應該知道嘞。
簡單嚟講，花旗嗰邊經濟前景好悲觀，股市前景當然黯淡，𠵱家仲喺高位企得住，都係靠一啲所謂「憧憬」炒炒吓，遲啲「醜婦見家翁」，唔好嘅嘢越浮越多，越嚟越嚴重，就會係花旗股市急插嘅時候。
港股係國際市場，唔多唔少會受影響，好彩「中國概念」仍吃香，香港情況唔會太惡劣，不過，穩陣計，暫宜小注炒作。
交行C輪1254：交行（3328）上禮拜五報收9.14元，大成交炒上，呢個禮拜應可繼續推向10元關，可以買啲交行C輪1254，上日收1.36元，有效槓桿率4.6倍。對冲值0.68，正股升上10元，1254應該喺2元樓上，上升空間有近5成，正股跌穿8.68元止蝕。