大家有無留意，香港嘅賣車廣告多數都係以車本身嘅Image做賣點，好少用明星做代言人。睇番離我哋無幾遠嘅日本，情況就好唔同，唔理係中坑定美少女，一樣有市場。首先吸引我哋視線嘅，就梗係由一班當紅美女擔綱嘅廣告啦。
記者：禾人
先嚟睇睇喺香港都有啲人氣嘅上戶彩同大發Sonica拍嘅廣告。22歲嘅上戶彩唔算太靚女，最近拍劇又套套仆直，揀佢率先登場係因為呢條叫「交換篇」嘅廣告片實在太爆笑！片中佢飾演一個騎住掃把飛天嘅可愛女巫，飛飛吓見到馬路有架大發Sonica，「想唔想試吓？」上戶彩向靚仔搭訕。飛掃把喎，係人都想試啦，就係咁，上戶彩就用把爛掃把同人換咗架靚車啦！女巫就好爽咁揸走架Sonica，獨剩靚仔騎住掃把原地跳！真係好搞鬼。
網址： http://www.daihatsu.co.jp/showroom/cm/sonica/