喺兩鐵合併消息刺激下，地鐵（066）股價急升，上個禮拜五，稍為回落3%，收報21.4元，但成個禮拜累積升咗約13%。Shalalala好興奮話：「政府係地鐵最大股東，咁即係街貨少啦，容易炒上，喺兩鐵合併消息配合下，地鐵好快變做子彈火車！」Chchoy1975亦高呼：「地鐵飛站呀！飛站呀！股價冇brake（煞車掣）唔識停。」
膠波仔呼籲：「地鐵一係唔炒，一炒就炒上幾蚊，各位上咗車嘅乘客，唔好諗住咁快跳車，以免夾嚫，賺少咗就唔好啦，多謝合作。」Bonjeu話：「佢係穩陣之選，不過升幅當然唔可以同大陸H股比。」蒙面人就充滿期待：「地鐵𠵱家試衝緊22蚊嗰度車門，衝得上就海闊天空喇！」
不過，Ｘofish_amy唱反調：「長遠啲睇，合併咗後，原本以地產業務為主嘅地鐵，冇咗票價自主權，經濟好時唔可以隨便加價，經濟差就更加唔使諗，到時地產收入大減，究竟合併係咪真係咁有利，好值得三思。」
爾仔亦話：「開到車就最好啦，最怕股東會否決合併，到時要入番廠就大件事喇。」
http://www18.discuss.com.hk/viewthread.php?tid=5209698&extra=page%3D9&page=1