外滙基金自爆高位掃港交所（388），跟住敏妮嘅電話開始響，聽到第一句係「敏妮請食嘢！」原因係睇過敏妮呢個專欄嘅朋友，都知敏妮月供港交所，今次走唔甩。
今年1月8號《敏妮Talk》講過，由於滙豐銀行唔再畀客戶碌卡供股票，所以敏妮嬲起上嚟轉會去中銀，兼停供滙豐（005）轉供港交所。揀港交所原因係每次大牛市都有唔同炒作主題，你好難估到下一潮炒乜，但無論炒乜，用嚟炒作嘅『廚房』，就一定撈到油水，最重要係港交所喺香港做獨市生意。敏妮仲貼佢會係股王之王。
一般銀行月供股票會喺每月10號扣錢，然後喺下一個交易日開市後15分鐘入市買，為咗方便起見，敏妮用入市嗰日嘅收市價計，假設月供5,000蚊，由今年2月開始供，家吓應該有374股港交所，平均每股成本92.73蚊（見表），以上個禮拜五收市價158蚊計，賬面賺24,411銀。
單睇表面，敏妮今次make到個「rightcall」，但其實要同跟敏妮一齊月供港交所嘅朋友講句sorry，因為如果當時成手買而唔係月供，你家吓肯定更高興。不過，「有早知，冇乞兒」點會估到藍籌股炒上幅度媲美二三線股仔。
諗緊買一手短炒
就上面嘅結果，仲欠126股先夠一手，如果港交所嚟緊幾個月仲keep住上個禮拜五個價，咁仲有望年底前供滿一手。就算直接喺市場買埋嗰126股，假設今日仲可以用到158蚊買，呢一手港交所每股嘅成本都係增加到109.18蚊，對好多人嚟講仲好吸引。
不過，敏妮考慮緊嘅唔係買126股碎股，而係好唔好直接買番手港交所短炒，條數仲計緊，聽日話你知。
http://manlitalk.com/blogs/