公仔箱近來搞咗個新節目，成日搵班嘉賓上去食埋啲核突嘢，其實都幾惡心。呢個節目仲執咗幾個女仔做陪襯，仲將佢哋包裝成「水果妹」。鏡頭前佢哋好似相處融洽又合拍，但鏡頭後，幾個水果妹就大搞小圈子。
成班水果妹有啲係選美落選佳麗，有啲係樂壇新人，多女仔嘅地方自然多是非，其中一個水果妹「假丁丁」係眾人之中，樣貌同表現較為突出，甚得工作人員寵愛，所以其他嘅水果妹就群起杯葛佢，對佢眼睥睥之餘，又唔瞅唔睬，有時排位影相又借意鬆佢踭。不過假丁丁聰明到極，不時大施嗲功博同情，令一向好博愛嘅肥監製，成日私下安慰假丁丁，令到佢更恃寵生驕。
Textby關仁