以狗為題材嘅電影，故事大都係圍繞人類同動物之間嘅友情，而動物絕對唔會凌駕人類嘅智慧。不過新片《超能特工狗》（Underdog）裏隻狗仔，竟然擔當起拯救世人嘅任務。佢仲一次過模仿超人、蜘蛛俠等超級英雄，又識飛又識爬，真係一啲都唔簡單。 撰文：戶川淳
改編自同名經典卡通片、將於下周四（9月20日）上映嘅真人特技片《超能特工狗》，主角當然係狗唔係人啦！嗰隻比高（Beagle）超能狗叫做鞋油，本來係警犬小隊隊長，率領整隊獵犬小隊，負責偵緝毒品同爆炸品等危險物品，一次意外佢闖入瘋狂科學家巴西蒙嘅實驗室，結果被注入基因改造嘅藥物，得到超能力。
飛天遁地講英文
鞋油成為超能狗後，唔單止變得力大無窮、飛天遁地，仲識得講英文。為咗掩飾身份，佢甘願做幹探家庭所收養嘅寵物，到有需要時先至着上戰衣拯救世人。鞋油捍衞全城治安，得到全城敬仰，兼且受曲架狗女傾慕贏得美狗歸。
科學家巴西蒙當然唔會就此罷休，佢因為透過改造基因發掘潛藏超人能力嘅研究計劃，得唔到市長採用而懷恨在心，所以要用自己嘅研究統治世界，一方面想奪取超能狗嘅超能力，另一方面將飼養嘅三隻兇猛狼狗注入超能力，令超能狗鞋油同人類身陷險境。
超能狗因為有人性同識講嘢，所以除咗會大玩爛gag之外，仲擺到明玩寸超人、蜘蛛俠等英雄icon。超能狗出更時，學人披斗篷着貼身褲，兼且無端端衝入電話亭，明寸超人嘅變身係多餘。佢又用佢最強嘅鼻周圍索，試過學蜘蛛俠爬牆恥笑爬緊牆嘅賊仔，又用口夾硬拉停高速汽車，擺到明寸《蜘蛛俠2》（Spider-Man2）入面嘅經典場面啦。
狗演員身世可憐
雖然片中啲狗演員咁叻，但原來現實生活中佢哋身世都幾可憐，全部嚟自美國各地被遺棄狗隻嘅收容所。好彩佢哋喺拍攝時聽教聽話，最後監製等工作人員都領養咗佢哋做寵物。至於冇被領養嘅狗演員都重獲新生，全數加入動物特技公司，全職做狗演員拍電影同廣告。
話你知：經典卡通啪丸變身
《超能特工狗》本來係美國NBC電視台播放嘅經典卡通片，由1964年首播直至1973年大結局，一共製作咗124集，而喺70年代亦推出過超過20期嘅漫畫。當年超能狗都幾受歡迎，試過喺79年製造成大型氣球公仔，出現喺感恩節遊行上。
今次電影同原著最大分別，係卡通片中特工狗要食咗大力藥丸後先至擁有超能力，情況有啲似我哋認識嘅大力水手，平時佢只係隻普通狗，而且將藥丸收埋喺特製狗環度，試過有幾集佢就因為唔見咗狗環而冇得變身。