左丁山話唔入住新開張嘅酒店，但對一啲有名氣嘅酒店，總係心思思要去試吓，有時試吓入住，有時試吓飲食，總係要「曾到此一遊！」○三年喺倫敦就特登去著名嘅Savoy酒店試下午茶，訂完位仍要排隊，在所不惜。飲完就知呻笨，四個人用咗一百五十鎊，得到並不一流嘅服務，並且差過香港文華東方酒店嘅下午茶食品，用百五鎊認真肉痛。
八月尾到東京，本想入住熟口熟面嘅新宿CenturyHyatt，肥仔K話佢睇過「迷失東京」（LostinTanslation）套戲三次，套戲以新宿ParkHyatt為主要背景，建議左丁山不如試吓ParkHyatt，價錢當然係貴啲。學梁錦松話齋，收埋嘅錢未必係你嘅，使咗嘅錢先至係你嘅，一於去卜實ParkHyatt，睇吓與上次住過嘅東京目白區春山莊四季酒店如何比較。
晚上自成田機場上巴士，一個半小時後到咗ParkHyatt門口，美麗bellgirl攞走行李，請左丁山上大廈四十一樓。一上到去就幾乎迷失咗，燈光好柔和，抬頭望到天空，庭中有花草，點解呢？原來四十一樓有層空中lounge，上有三角形玻璃天幕，月亮如掛在頭上。定一定神，行過長長走廊轉左，突然係一系列圖書架，似係圖書館，再轉右，先至到上房登記處，冇櫃台，只有登記台，登記住客各佔一方。接待員迎面而至，直情帶左丁山上房（四十二至五十二樓，好似有一百七十幾間房，健身室、游水池、美容室）唔使等三分鐘！房間寬敞，比一般日本酒店房間大好多。房間有平面電視，浴室亦有電視，方便之至。
搵肥仔K到酒店行吓，佢即刻應承，話平時以學生身份唔敢走上嚟，今次一睇，就好似到咗「迷失東京」套戲嘅現場，好有feel。唔怪得一啲酒店鍾意大明星入住或拍戲，因為宣傳作用既深且廣也，可惜酒店嘅videoondemand之中，冇「迷失東京」在內，其實房間有埋DVD機，假如左丁山係酒店公關，一定喺每間房放置「迷失東京」嘅DVD，加強套戲嘅宣傳效果。第二日到餐廳食早餐，有兩位美國西裝友請左丁山代佢哋拍合照，以餐廳為背景，佢哋亦可能係睇過套戲也。