不少電視台花旦小生走紅前後兩個樣，以致整容疑雲滿天飛。近日因不滿無綫偏私及貪新忘舊、於月前選擇離巢的王賢誌，日前接受本報專訪時，不但大爆13年前簽約無綫時被要求先整容後入行，且透露無綫甚至介紹整容醫生給藝員做手術。
出身名門的王賢誌自小醉心演藝圈，故大學畢業後有太子爺唔做，到無綫當藝員由茄喱啡做起，捱了13個年頭，王賢誌的主持地位雖然得到觀眾認同，但眼見好些遲來者如崔建邦等一個一個比自己先上岸，入行沒多久即獲無綫力捧做台慶司儀，加上近年被無綫冷待，令王賢誌意興闌珊，今年5月底約滿後便不再續約，另謀發展。
被嘲諷兒時撞傷嘴
現時王賢誌除為父親打理家族生意外，更與亞視和有線斟洽合作，日前他接受本報專訪，被問到在這13年演藝生涯中的所見所聞時，王賢誌坦言很多事情是他意想不到，他說：「啱啱入TVB嘅時候，我同藝員部某高層傾約，佢無端端問我：『你細個係咪撞親個嘴？我畀啲時間你整整先。』吓？我覺得好愕然，可能佢覺得我口大，畀啲時間我修整一下先至同我正式簽約。結果我真係搵咗個整容醫生聽取意見，醫生話做手術嘅話，要喺口裏邊開刀，然後縫埋，但肌肉會變得好僵硬好唔自然，所以呢個手術最好唔做。跟住醫生又同我講，TVB都有叫過一啲藝人嚟整容，換言之我唔係第一個，原來入行係要有呢個（整容）心理準備。」
問王賢誌最後有否接受整容手術？他說：「我到最後決定放低呢個心理包袱，因為我唔係靚仔，我唔覺得自己整容後會變成一個靚仔。我唔係sell外形做賣點，我係sell口才，主力做司儀同主持，當觀眾接受你之後，就唔會介意你係咪靚仔靚女，好似曾志偉、阿旦（鄭丹瑞）、肥姐（沈殿霞）同嘟嘟姐（鄭裕玲），都唔係靠外形。」
「最緊要入行前去整」
王賢誌續說：「我又唔係諗住拍劇做男主角，點解要整到個男主角樣？其他男主角我唔知，但我唔得，雖然都有人以為我整過容。其實我只係箍過牙，我知佢哋（無綫）好興叫人箍牙，但好多人攞錢出嚟箍一年半載，箍完咪又係冇嘢做。某程度上唔可以話呢間公司唔啱，佢哋只不過提議一個藝人點去裝備自己。呢樣嘢亦唔係一個簽約條件，到後來佢哋都簽咗我。如果佢哋冇咁嘅提議，我係從來冇諗過整容，開頭佢哋咁講，好打擊我入娛樂圈嘅信心，我知道自己欠缺某方面條件，所以自己先至會更加努力。」
記者問無綫有那些藝員曾經整容時，王賢誌笑說：「睇得出嘅，只要你睇番重播劇集或者係舊相嘅話。」
問王賢誌是否贊成藝人整容？他說：「我覺得只要出嚟效果又靚又舒服嘅話，整容係冇問題嘅，但最緊要係入行前去整，如果入行後先去做，人哋見過你以前個樣嘅話，會好奇怪。」
蔡淇俊受勸導箍牙
對於王賢誌指藝員部要求他整容一事，無綫製作資源部副總監樂易玲昨日在電話中回應說：「佢13年前簽約嗰陣，我都未入TVB，所以我不予置評，但今日嚟講我哋冇提倡亦冇叫藝員整容，公司各類型演員都有，唔同樣貌可以做唔同角色，我哋覺得觀眾緣先至係最緊要。有啲演員紅咗自然信心大咗，個人都會靚啲。至於牙齒保健對每個人都好重要，我承認我哋有建議藝員去箍牙，但我唔認為箍牙係整容，有啲藝員拍嘢時成日就住就住，因為自己啲牙唔齊唔靚，好似蔡淇俊咁，所以我哋係有建議佢去箍牙。」
採訪：林妃
娛樂資料庫
小生花旦整容嫌疑犯
無綫向來有不少藝員被傳曾經整容以換取更佳星途，只是甚少有人肯公開承認，即使認也只是割雙眼皮等小手術。
我是誰
名門之後慘受冷待
大爆無綫黑幕的王賢誌現年35歲，是已故「電子大王」王華湘的長孫，父親王忠桐為王氏港建國際集團創辦人兼主席，家族資產逾15億，名聲顯赫。94年他在加拿大UBC大學市場學系畢業後，毅然簽約無綫成為藝人。
多年來王賢誌一直默默耕耘，起初只獲派主持深夜播放的《翡翠音樂幹線》，至近年終在主持工作方面取得成績獲觀眾認同，成為不少綜藝節目司儀，但一直未獲無綫力捧，且受重視程度遠遠不及出道不久的崔建邦及王貽興。
娛樂資料庫
無綫高層力捧自己友
近年一直有傳無綫電視總經理陳志雲愛力捧「自己友」，如愛將崔建邦出道不久即獲器重，被安排主持不少大騷，而且幾乎每晚於不同時段，都能看到崔建邦主持的節目；至於憑《最緊要正字》極速上位的王貽興，即使主持的節目不獲好評，但新節目仍一個接一個推出。
近期最得寵的則是剛回巢的鄧健泓，他更踢走崔建邦，被安排成為全新一輯《勁歌金曲》主持，又獲派主持逢星期二至五播出的《味分高下》，曝光率甚高。
