各國領導人參加好似APEC呢類國際性會議，禮節上會帶埋另一半出席，煲呔置身其他高大威猛國際領袖之中平平無奇，反而香港「第一夫人」鮑笑薇就攞晒彩，噚日參加大會主辦嘅「太太團」SpousesProgramme，同其他元首夫人（或者丈夫）去悉尼好出名嘅野生動物園TarongaParkZoo參觀，摸完鱷魚摸大蛇，樂而忘返。
黑超上陣主動摸動物
TarongaParkZoo有成百年歷史，佔地30公頃，入面有大笨象、老虎、長頸鹿等多種動物，不過元首夫人時間有限，所以有關方面唔使佢哋遊花園，只係安排佢哋定點參觀，由員工逐隻逐隻抱住啲動物出嚟畀貴賓睇，有樹熊、小袋鼠同樹蛙等，然後畀記者影相。呢種安排，可以話係「太太團」參觀動物園，調轉頭話係動物參觀「太太團」亦未嘗不可。
曾太對呢個安排隨遇而安，仲表現得興致勃勃，不時主動摸吓啲動物，連鱷魚仔同大蛇呢啲令好多女士花容失色嘅醜樣動物，佢都冇有怕伸手玩吓。在場人士無不報以讚賞目光，估唔到外表斯文嘅香港「第一夫人」原來咁大膽，加上佢係「太太團」中唯一戴黑超上陣嘅夫人，星味十足，搶咗唔少鏡。
摸鱷魚玩大蛇似乎唔係做騷咁做作，曾太睇嚟真係對動物好好奇，不斷詢問員工，問隻動物幾多歲、叫咩名、難唔難養等等，其他元首夫人冇咁有興趣，係咁意摸吓啲動物，影完相交咗功課就企埋一邊。曾太參觀期間，全程同主辦國澳洲總理霍華德夫人JanetteHoward孖住一齊行，雞啄唔斷好好傾。
曾太玩蛇之際，煲呔卻「中招」，事關與會領袖要着起件「黑麻麻」嘅油布防水大褸合照，現場傳媒對呢件衫劣評如潮，煲呔揀咗綠色衣領，雖然佢冇講嘢，但個表情已經話畀全世界知佢想即刻除低件衫，其他國家領袖表情都差唔多。煲呔今朝會同胡主席食早餐，噚日兩人都有碰頭，不過鏡頭前冇乜傾偈，可能等埋今朝一次過慢慢傾。