以前講賽車Game，有人會搬出「《GT》先係王道」嘅陳舊理論，話其他公司嘅作品玩嚟都係唔識貨喎！到咗微軟投身遊戲事業，炮製出《世界街頭賽車》（ProjectGothamRacing）呢個品牌，先至逐漸令大家嘅情意結改觀。而到咗今集《PGR4》更可謂開天闢地，增添唔少正到飛起嘅Idea。其中最得香港人支持，唔使問阿貴都知道係加入澳門賽道，同埋可以落場揸電單車掟番幾圈。
文：陳福榮
澳門直擊
天氣變化真實感大增
以前玩賽車Game，好多時跑晒咁多圈都係日光日白，不過隨住機能提升，好多過往冇人留意嘅設定就變得越嚟越有意思，至少隻隻都會有日夜光源變化。《PGR4》就更大膽引入天氣模擬變化設計，每次比賽都唔會有固定嘅亁爽路面或者雪花紛飛，隨機決定每一刻係落雨定天晴。輕則對車廂視點產生極明顯嘅視覺效果，重則就要喺「落狗屎」嘅濕路上片車隨時跣軚，有時仲會濃霧片片影響對轉彎位嘅判斷能力。呢種情況喺賽事途中不停變化，極講求玩家嘅臨陣適應力。
至於新賽道方面，大家關心嘅澳門同上海各自都會有11條不同賽道，另外新增嘅城市仲有加拿大溫哥華與俄羅斯聖彼得堡，內容份量確實係多到有排都未玩得晒。
電單車跑車同場激戰
如果話《PGR4》引入電單車係啓蒙自《GT》嘅姊妹作品《TouristTrophy》，咁佢容許兩個轆同四個轆同時較量就肯定係前所未有咁正斗。咪睇佢只係收錄咗25款來自寶馬和本田等車廠嘅鐵馬，數量好似好少咁，但其實玩起嚟真係一啲都唔失禮。
可能有人會話跑車一定贏硬啦，咁比法有乜意思？開發人員當然深明此道，所以專登設計到兩個轆嘅起首加速力超勁，兼且靈活到左穿右插、食內線偷位抽頭嘅情況經常發生。不過佢都有致命缺點，就係由於「皮包鐵」，所以係咁意撞吓都會人仰馬翻，唔想俾跑車撞到飛起就切記要睇路行。跑車車款方面多至120款，包括有多部法拉利、林寶堅尼、GTR-1Coupe同Supra等，橫跨多個不同年代任你揀。
親身試玩澳門賽道
筆者最近有幸獲邀試玩定必成為10月HotTopic《PGR4》嘅最新版本，逐忽試真每個特點，仲有專人講解，對佢嘅感覺即時改觀，覺得佢絕對有力威脅到《GT》地位。呢個試玩版同剛於德國萊比錫舉行完嘅GDC2007一樣，都係源自7月美國E3嗰個Demo，應該係發售前嘅唯一試版。唔知係咪想晒料畀亞洲傳媒睇，佢只有一條賽道同一架車可以用；但正因為咁，反而呈現出本來特色，原因係可使用車款居然係今集新設嘅電單車，而賽道就係香港人好熟悉嘅澳門。
除咗因為開發版FrameRate未調節到最完美之外，喺720p嘅環境基本上都做到足30Frame。如果配埋HDMI線1080pUpscan輸出畫面就當然更理想，但用色差玩已經好對辦，據知完成版會做得比𠵱家更靚。較令人印象深刻嘅係，澳門街頭啲舖頭招牌同店面裝修都似層層，賽道兩旁觀眾更加唔係紙板人，個個都有唔同甫士，單就呢點《GTHD》都要彈開一二邊。
提早訂購送精品
PS3到10、11月先至嚟料，微軟就提早在9月底全力搶灘，以機迷至愛鎮山之寶《Halo3》配合男女老幼都啱嘅《PGR4》，加埋型仔到爆嘅黑色Elite版主機，可知今場仗佢哋係幾咁重視。為關照各忠心客仔，由𠵱家至9月23日之前喺特許零售商訂購《PGR4》和《Halo3》限量版（售價$349），就可獲得別注版PGR4×Toy2RQee、Halo3×Toy2RMasterChiefQee（三款任擇其一）以及$80現金優惠券。
機種：Xbox360
廠商：MicrosoftGameStudios
類型：RAC
人數：1-8人
售價：$299
推出日期：10月2日
查詢：香港微軟（800964215）
