保護環境係世界大趨勢，今年APEC會議都以環保做主題，各國噚日簽署溫室排放宣言，希望可以喺2030年前將能源消耗量減少25%，香港做唔做得到係未知之數，但既然煲呔大力推行「藍天行動」，政府部門當然要身體力行，除咗將冷氣維持喺攝氏25.5度同全面改用慳電膽外，環保署仲有一項慳家招數。
慳埋慳埋唔少嘢
隨同特首去悉尼出席APEC嘅環保署副署長陳嘉信話，環保署office𠵱家一到晚上7點放工時間就停止熱水供應，周末、周日雙休日更加唔使講啦，要開OT或者放假返工嘅公僕，只有凍水飲。冇熱水影響有限，最多唔可以冲奶茶、咖啡等飲品，陳嘉信話唔好輕視呢個措施細眉細眼，長年累月慳埋慳埋就唔少嘢，不過暫時只有環保署推行，其他部門員工夜晚7時後仍可以冲熱飲，八方相信位於禮賓府嘅特首辦都唔會推行，事關煲呔住喺入面，夜晚截熱水好麻煩。
陳嘉信有份草擬上述宣言，佢好有信心香港可以達標，指香港喺節能方面一直做得好好，過去10年能源消耗量少咗13%，講出嚟唔失禮。